友情才是比賽勝出的關鍵！

參加比賽最好就係揾自己友一齊做。因為彼此認識對方的強弱項，做事就會有商有量。所以喺呢一次比賽，我最先揾咗陳嘉浩，皆因佢嘅電腦技術較好，我地又最合拍。林栢堅對大自然的知識就較豐富。馬志邦都係兄弟嚟架。而邱敏為人有活力、又細心。我地就係咁樣組成一隊人去參賽。

我地雖然只係識咗兩至五年，但係彼此之間互相信任，有互動同埋默契。所以分工嘅時候都唔會爭餐死。有人擅長影相、有人善於安排行程。大家都相信佢地嘅經騐同能力。唔怕蕩失路。不過受到酷熱天氣，同埋路程遙遠嘅影響，好多時候我地都行得幾辛苦。但係我地會互相安慰，即使行錯方向，心情唔好，都冇因為咁而亂發脾氣，怨三怨四。
例如馬屎洲一行，因為大家都曾經去過，雖然嗰日好曬，但係都行得好開心，好輕鬆。至於大欖涌一役，我地喺烈日下行山，而且行行吓仲聽到遠處的雷聲，都有啲擔心嘅。因為有一半人都冇帶遮，落起雨嚟，一定變晒落湯雞。而且我地從未去過嗰度，沿途嘅指示牌又亂指一通，行咗好耐都見唔到盡頭。雖然大家都好疲倦，但係都互相以「前路充滿轉機」作為鼓勵。最終都可以完成旅程。

又如東平洲之旅，因為之前落咗成10日雨，地面又生滿青苔，所以極度濕滑。有人仲跣低咗，搞到成身青BB，大家除咗扶起佢，仲等佢整乾淨先至起行。之不過行行吓，發現周地都係1cm長嘅大黑蟻，而且仲會爬入我地嘅鞋同褲裏面。呢個時候，就梗係只顧搏命跑，忘記咗有啲行得慢嘅組員。後來都有啲後悔。因為喺緊急關頭，竟然揼低佢地。好彩佢地都冇嬲。雖然有啲埋怨，但係都冇發火。就係呢啲點點滴滴，都成為我地寫blog嘅題材。

合作做事，友情非常重要。雖然人人性格有別，但係我地會求同存異，互相包容同體諒。所謂同心就事成，就算贏唔到比賽，都會贏到一生嘅友情。

By Dicken