淺探：元朗尖鼻咀觀鳥1

今日入元朗，上午會去尖鼻咀觀鳥，然後是河背水塘同埋大欖涌水塘。

先講講尖鼻咀，我地以35號綠van為座駕，以「尖鼻咀有機農場」為落車的記認，然後大家就沿住一條林蔭大道走向邊境路。道旁有個警崗，仲有一個第五類危險品倉庫：「上彈處、退彈處」，幾得意！

再行前啲，就會見到邊境路旁那一排高高長長的鐵絲網圍欄，原來彼岸就係深圳！完全有「一水之隔」之嘆，是現代城市(深圳)與原始鄉郊(濕地)的分別！。與在港島，隔着維港，望向九龍，完全是兩種感覺！再往前走，誰料到「路有窪徑丈」！一個大水「tum」擋住我地嘅去路！於是我地就以圍欄旁的鐵管為橋，「勇敢地」攀越過去。

是日最開心嘅係見到好多小白鷺，可惜我只能影到佢地停低歇息的樣子，而且仲因為距離遠，所以效果不大理想。加上舉得起相機來，佢地已經橫過晴空，飛翔嘅英姿只「可遠觀而不可攝下焉」！！！><而尖鼻咀之旅是在候車處的「尖鼻咀有機農場」所傳來陣陣有機肥料的氣味中結束！><

by Dicken